Tambuh Ciek

Wartawan : Hakimah Rahmah S • Editor : Riyon • 2016-05-15 10:04

“Ni, tadanga dek Iroih uda-uda nan rumah e di subarang jambatan dakek masajik tu, ka babini ciek lai. Nan poligami kecek urang tu mah Ni a. Nyo lai ka urang kampuang awak juo. Tapi, antah ba a, eboh se urang gara-gara kaba tu,” kecek Iroih ka si Barinam.

“Ha, taragak babini lo si Buyuang tu. Ciek se indak abih, tambuh lo ciek lai,” jawek Barinam santai.

“Dek itu lah, Ni. Dek indak abih-abih tu mako nio tambuh ciek lai.”

“Dari ma lo dapek kaba dek Iroih?”

“Dari kawan Iroih. Inyo kok masalah-masalah mode tu kancang antene e mah, Ni.”

Ondeh!”

“Uda tu bia bisa babini ciek lai, bia tambah mantap persiapan e, ka sato lo acara nan dibuek urang di Jakarta nin. Ado penginapan e. Takah pelatihan tu lah Ni a. Ba a persiapan e, tantangan nan ka dilalui, ba a caro manjalani, pokok e langkok lo lah, Ni. Pelatihan pra-poligami syari’i.”

“Dari ma lo Iroih tahu? Dari kawan nan antene e tinggi tu juo baru?”

“Ba a manuruik Ni Nam? Lai paham dek Ni Nam poligami tu? Lai satuju?”

“Kok Ni Nam, lai satuju poligami tu mah, Roih. Kan di dalam agamo Islam, poligami tu dibulihan. Malah itu labih rancak lai.”

“Iyo, Ni? Ondeh, sabana hebat Uni e si Iroih ko.”

“Iyo. Asalkan...,”

“Asalkan bisa adil kan, Ni?”

“Asalkan indak laki Ni Nam,” kecek si Barinam maindakan. Galak mereang.

“Hualah. Sangko hati kok iyo lo mah. Eee, yayay.”

“Cubolah dek Uda tu, mangecek mintak tambah bini se, batu lado ado nan ka mananti. Kok mintak e bini mudo lo, karek kayu lai di balakang pintu tu ha,” jawek si Barinam sambia manyenseang langan baju.

“Lai takah padusi kebanyakan lo Ni mah.”

“Bato pulo. Tantu lah iyo nyo. Jan salah-salah lai, Roih. Dulu, jaman saisuk, nan kayo kecek urang tu nan banyak bini mah, Roih. Disagani urang kok banyak bini tu. Sampai babaleh-baleh banyak e bini urang tu. Tiok suduik kiro e ado anak e. Kini ko nan jarang lai nyeh, Roih. Jaman batambah maju juo.”

“Iyo, lai ado tadanga dek Iroih wakatu mande Iroih carito ka kami di rumah mah, Ni. Amak Iroih tu se lai tigo laki e mah, Ni. Carai ciek, maningga ciek, ko nan abak Iroih nan lai batahan sampai kini.”

“Kini kok banyak-banyak bini tu, ganjia kecek urang. Apolai kok ustaz, kyai nan poligami, indak siagak kanai kecek dek urang. Tipi sato-sato lo, manjadi minyak tanah. Tabaka nah nyeh. Ndak do lai, disuduikan urang. Cubo kok film-film nan indak sindereh tu a, didukuang mati-matian dek urang. Tu lah realita di jaman kini ko, Roih. Nan batua disalahan, nan salah dibela mati-matian,” kecek si Barinam.

“Hmm, tu ba a kok padusi indak bulih balaki sakali banyak, Ni?”

“Tantu lah iyo, Roih. Payah nah manantuan sia ayah anak-anak e nah nyeh.”

“Ooo iyo ndak. Batua juo tu mah,” kato Iroih sambia manggaruk kapalo.

“Jadi, Ni Nam satuju masalah poligami tu?”

“Iyo, Roih. Ni Nam satuju bana. Pokok e, asalkan lai indak laki Ni Nam se lah,” galak manih.

Indak lamo sasudah tu, ado urang nan mangatuk-ngatuk pintu. Rupo e, laki si Barinam baru pulang dari Padang. Agak lain galak e, rawik muko e sabana cerah.

Sambia maimbau si Barinam, dikaluan malah karateh bawarna biru. Dari jauh, tabaco dek si Barinam pra-poligami. Antah a nan tajadi sudah tu, nan jaleh si Iroih langsuang kalua dari pintu balakang. (*)