Baraja Adaik Kutiko Libur Sakolah Dikampuang Niek Reno

Wartawan : Puti Reno Raudha Thaib - Ketua Umum Bundo Kanduang Sumbar • Editor : Riyon • 2016-05-29 09:47

Sasudah Sumbahyang Isya di ruang tangah Rumah Gadang Niek Reno nampak banyak urang duduak barapak maadoki hidangan goreng pisang rajo jo katan nan ditaburi jo parutan gulo anau. Lamak bana nampaknyo. Ruponyo cucu-cucu Niek Reno baru tibo tadi siang  basamo jo kawan-kawannyo samo sakolah di Padang. Anak-anak tu baru salasai ujian.

Mareka lah bajanji jo Niek Reno sasudah ujian kan pulang jo kawan-kawannyo ado Luthfi, Nasyifah sarato Tiara kawan Aisyah, ado Thoriq jo Raffi sarato Annisya kawan Fathir. Ado Latifah  jo Intan kawan Puti.  Niek Reno duduak basamo jo anak-anak tu. 

“Baa lai lamak katan jo goreng pisang rajo nan dibuek dek oncu Mayang dek kalian  urang kota nan biaso makan KFC, Mac Donald, Pizza Hut?”. Niek Reno batanyo ka anak-anak tu. Sado anak-anak manjawek.

“Sedap Niek, rasonyo asli”. 

“Syukurlah lidah kalian lai masih asli alun batuka jo lidah urang bule lai.Nyo baitu mah dek kalian. Salero ko juo manjadi panantu dari karakter awak mah. Kecek niniek moyang awak daulu, lai lamak juo buah jarami lai, mako lai indak kalupo dimano asa awak”. Niek Reno maajuak hati anak-anak nan baru ka gadang tu.

“Niek, ado nan ingin kami kecek an ka Niniek mah, tantangan rancana kami balibur kiniko”. Aisyah mangecek ka Niek Reno.

“Apo tu rancana kalian, kecekanlah ka Niniek, sahinggo dapek awak rancang”. Niek Reno batanyo ka anak-anak tu.

“Mukasuik kami nan utamo balibur kiniko adolah untuak baraja tantangan adaik jo budaya nagari awak ko Niek. Untuak mancaliaknyo jo marasokannyo sacaro langsuang di kampuang. Makonyo ayah jo bundo kami sangaik satuju jo rancana libur kami ko Niek”. Lutfhi kawan Aisyah manjalehkan ka Niek Reno tantangan rancana mareka salamo barado di kampuang.

“Syukurlah kalian lah baniek untuak baraja tantangan adaik jo budaya awak, rancak bana tu sambie balibur kalian baraja. Awak mulai malam ko baanyo?”. Niek Reno batanyo ka anak-anak tu.

“Siap Niek”. Sarantak anak-anak tu manjawek.

“Kini awak mulai mangatahui tantangan diri awak surang-surang dulu. Partamo Niniek ka batanyo ka kalian surang-surang. Kalian ko urang ma, dimano kampuang kalian, apo namo suku kalian, siapo namo ayah kalian, dimano kampuangnyo, apo suku jo galanyo ayah kalian. Siapo namo jo suku sarato kampuang bundo kalian, sia gala datuak di suku kalian, rumah gadang kalian lai masih ado,  lai ado batulihan Ranji Kaum kalian, kok lai bara generasi. Itu contoh partanyaan nan harus kalian jawek”. Niek Reno manjalehan apo-apo sajo nan harus dikatahui dek satiok urang Minangkabau ko.

“Barek mah, bantuak ujian lo mah Niek”. Jawek anak-anak tu.

“Sabananyo indak samo jo ujian do, indak barek bagai tu doh. Apo nan Niniek tanyoan ka kalian saharusnyo lansuang dapek dijawek capek. Dek karano itu adolah identitas atau jatidiri awak sabagai urang Minangkabau. Jaweknyo indak kini doh bisuak malam sasudah Sumbahyang Isya. Jadi malamko sabalun lalok kalian bisa mamikiekannyo, kalau paralu tanyoan ka ayah jo bundo kalian”.

“Yo Niek”. Anak-anak tu sarantak manjawek. (*)