Iyo Juo Mah

Wartawan : Hakimah Rahmah S • Editor : Riyon • 2016-05-29 09:48

“Tasuduikan bana raso e Ni Nam sabagai urang Minang gara-gara ado penelitian pakaro kota paliang Islami. Kota Padang paringkek nomor iriang, dari 29 kota nan ditaliti. Ondeh, sabana ka jantuang pai e, Roih,” kecek Barinam sambia manapuk-napuk dado.

“Kok masalah tasuduik, Iroih lai lo mah, Ni. Tapi dari sagi a Ni Nam maraso tasuduikan? Indak tarimo Ni Nam dah?”

“Dari hasil nan dikaluan dek institut nan mangarajoan penelitian tu ha. Muh lo Padang dapek nomor iriang? Malu Ni Nam sabagai urang Minang jadi e. Padahal, pamarintah lah basitungkin bausaho manjadian Padang tu kota islami. Eh, Tibo-tibo se ado hasil penelitian nan mambantah, malah Bali nan nomor satu. Lai indak salah tu?” tanyo Barinam.

“Ha, itu nyo, Ni. Itu tu pakai ilimu mah, Ni. Ado data-data e. Caro-caro e ado pulo. Kok nio mambantah, pakai ilimu pulo, Ni. Sacaro akademik pulo. Indak bisa awak bisakareh se di siko dah, Ni. Ndak bisa dek kecek se tu dah. Lagipulo dek Ni Nam eh, itu tu patuik jadi bahan renungan untuk awak mah. Indikator-indikator e kan jaleh. Ba a keamanan, kesejahteraan, jo tingkek kebahagiaan masyarakat e tu. Indak asa takok-takok uwok se dah,” jawek Iroih mayakinan si Barinam.

“Padang ko kan lai aman mah, Roih. Sejahtera lai lo, apolai kebahagiaan masyarakat e. Iroih kan lai marasoan ba a tingga di Padang.”

“Nan ka manilai awak tu rancak e yo urang ju nyeh, Ni. Kok awak manilai diri awak surang, yo rancak se nan tabaco nyeh. Kok nan buruk, samo-samo tahu se lah.”

“E, indak bisa mode itu dah, Roih. Ha, Padang haa, nan disabuik-sabuik urang agamo e kuek, dapek paringkek nomor iriang? Hualah, yo kapunduang mah!”

“Contoh ketek e, urang kok datang ka Padang, kok tasasak buang aia, atau pai ambik wudu’ di surau ataupun masajik, rato-rato kamar mandi e kumuh. Hariang. Indak iyo mode tu dek, Ni? Jan maindak!”

“Iyo juo mah, Roih. Alun lai kok babaun jariang, hualah.”

“Ba a ka nyaman urang kok mode itu? Di bandara, nan jadi tampek umum, internasional lo taraf e lai, tampek sumbayang e se sagadang lapek nyeh. Padahal, tanah lai salaweh langik. Gadang ju lapau karupuk sanjai pado tampek sumbayang lai. Ndak iyo?”

“Iyo juo mah, Roih. Alun lai karajo urang awak nan hobi mamalak, mamakuk harago sakandak paruik, jadi upek dek urang. Takajuik urang kok ka Padang dek e. Patang ko kan ado lo masalah kanai pakuk tu balik mah.”

“Itu masalah e, Ni. Sabana e rancak penelitian tu mah. Jadi bahan renungan dek awak. Untuang-untuang lai taniek untuk barubah. Saindak-indak e untuk manjago kebersihan kamar mandi umum, khusus e di surau jo masajik, supayo nyaman urang kok sadang di Padang, di Sumbar umum e. Itu tu kok diliek dari indikator jo faktor-faktor penelitian kota paliang islami nan diajuan dek institut t mah Ni a.”

“Hmm, yo yo.”

“Tapi, kok diliek dari ulama-ulama nan bapangaruh, sakola-sakola nan babasis kurikulum agama, peraturan-peraturan islami, yakin Iroih, Padangpanjang jo Padang bairiang-iriangan paringkek e tu mah. Penelitian patang tu kan beda lo dek e, Ni. Indikator e takah nan Iroih sabuikan cako.”

“Hmm, yo, yo. Mulai tabukak kiro-kiro Ni Nam kini,” jo angguk kapalo.

Itu salah e, Ni. Antah gai sajak ado penelitian ko, ado lo nan ka mambaleh hasil tu jo indikator lain lo lai ndak?”

“Bisa jadi, Roih. Salagi angek-angek ko, rancak diansua-ansua juo ndak a.”

“Iyo, iyo. Sarancak e, mudah-mudahan bisa jadi renungan untuk awak.” 

“Tapi, Roih, kok serius bana ota wak kini mah, Ni. Bilo wak ka galak ko?”

“Galak ka galak ju lai, Ni. Tambah maju gigi tu beko,” jawek Iroih sambia manunjuk gigi si Iroih. (*)